Plantun de Prouvènço

Pèr coumpara dos planto d'encò nostre

Lonicera caerulea & Scleranthus annuus

Lonicera caerulea

Caprifoliaceae

Noms en français : Camérisier bleu, Chèvrefeuille bleu.

Descripcioun :
Lou cabrifueio-blu es un aubret que trachis en moutagno souto li mele e proche di rousage. Li flour, jaunasso, soun bessouno pèr dos, ço que vai douna un fru bessoun blu. Li fueio soun verdalo.

Usanço :
Coume pèr la maje-part di Lonicera, li fru soun empouisounant (sabounino e baso nicotinico), fan raca e dounon la fouiro. A forto doso soun dangerous pèr lou cor e li nèrvi.

Port : Aubret
Taio : 0,3 à 1,2 m
Fueio : óupousado
Tipe bioulougico : Faneroufite
Cicle bioulougico : Planto renadivo

Gènre : Lonicera
Famiho : Caprifoliaceae

Coulour de la flour : Jauno
Petalo : 5
Ø (o loungour) flour : 5 à 10 mm
Flourido : Printèms

Sòu : Si
Autour basso e auto : Pancaro entresigna
Aparado : Noun

Liò : Mountagno mejano - Terraire safrous
Estànci : Subaupen
Couroulougi : Boureau
Ref. sc. : Lonicera caerulea L., 1753

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.